كلب الأمير عضنى لماجدة سليمان

عاشق حياة · عدد المساهمات: 67 تاريخ التسجيل: 03/12/2008

كلب الأمير عضني ..
نهش لحمي وسَمِني ...

جريت أشتكي ..

قالوا السبب في أزمتي ..

حنيتي ..

والغلطة كانت غلطتي ..

هي أكيد مصريتي..

شعب واخد ع الدماغ ..

مش من حقه حتى يشتكي ..

شعب عايش ع اللي راح ..

ع الكرامة اللي بقت ..

في التاريخ ..

حكاية تتحكي ..

صرخت يا ناس ..
دمي ساح ..

الكلب نهش جتتي ..

قالولي ما تبكيش ع الجراح ..

البكا يبقى ع اللي راح ..

د الكلب .. كلب أمير ..

انت اللي ضريته بعملتك ..

هنعالجه نتيجة عضتك ..

د كلب واخد ع الفيليه ..

الكرواسن والباتون ساليه ..

مش لحم بايظ من الأدوية ..

وحليب مغشوش ..

وجبنة فاسدة ..معفنة ..

وزيت شلجم ..

وعيش مسرطن ..

القمح من أمريكا جايلنا ..

وماية مجاري ..

بتجري في دمنا ..

يا عم روح ..

زهقتنا ..طهقتنا ..

قضية فشوش ..

وحش انت من الوحوش ..

ضريت الكلب بعملتك ..

وكمان جاي تشتكي ..

من علتك ..

يا عم روح ..

بعدين تدوخ ..

انت مش قد الأمير ..

ولا كلب الأمير ..

انت يدوبك تقدر ع الغفير ..

وكمان سفارته هتحميه ..يومين ومش هتلاقيه ..
مين تكون ..

واحد مجنون ..

ناقص عيون ..

مش شايف حقيقة ..

مالية الكون ..

تمنك ايه يا مصري ..

تمنك ايه ...

قرد متسلسل ..

يكون تمنه ايه ..

دستور واتهلهل ..

عشان الباشا ويا البيه..

عاد لك ايه ..

يامصري ..

تبكي عليه ..
لو زمان ..

قبل اللي كان ..

كان ممكن تاخد حقك ..و ف نفس المكان ..
دا كان زمان ..

النهاردة للأسف ..اكتم الكلمة ف حلقك ..
وحط لسانك جوا بقك ..

حط لسانك جوا بقك ..